ደቂ ባሕሪ ነገስታት!

ግጥሚ ብ'መሲናስ

ደቂ ባሕሪ ነገስታት!

Haben Fissehaye= ሰላም ንኣኻ ክቡር ሓው መሲናስ፡ ነዚ ብሰንኪ ስእነት መንግስቲ ኣብ ሊብያ ዝሳቐ ዘሎ ህዝብና’ባ ገለ በለሉ ነዚ ውጹዕ ህዝቢ?

Mesinas= ሕራይ ክቡር ሓው።

Haben Fissehaye= ክጽበ ኢየ ምስ የሕዋተይ መሲ

Mesinas= ቅሰን ክቡር ሓው! ንኣውያትዶ ሓታቲ ደሊናሉ፣ መሳኪን ኣሕዋትና!

Haben Fissehaye= ኣጆኻ በል መሲ ኣጆኻ

ኤርትራውያን ካብ ዘበን ባሕሪ ነገስታት ጀሚርና ክሳዕ ለይቲ ሎሚ እሰይ ኢልና ቀሲንና ብሰላም ዝነበርናላ እዋን ዋላ ሓንቲ መዓልቲውን ትኹን ኣይተራእየትን! እንተኾነ ግን ከም ሎሚ ጌርና ብኸቢድ ተፈቲንና ኣይንፈልጥን ኢና! ኩሎም ቅድሚ ኢሳያስን ስርዓቱን ዝሓለፉ ገዛእትን ጨቈንትን ህዝቢ ኤርትራ፡ ኣብ ልዕሊ ህዝቢ ኤርትራ ፍርህን ክብርን ኔሩዎም’ዩ። እዚ ርጉም ደማሒ’ዚ ግን ከም ህዝቢ ኤርትራ ጌሩ ዚንዕቆን ኣቕሓ ዘይቈጽሮን ፍጡር የብሉን! ናይዚ ህያው ምስክር ከኣ ኤርትራዊ ዜጋ ካብ ዚፍጠር ኣትሒዙ ከም ኣብ ግዜ ኢሳያስ ጌሩ ሓሲሩን ተዋሪዱን ከም ዘይፈልጥ ብግብሪ ንርእዮ ኣለና።

ቀደም ኣባሓጎታትና ናብ ሊብያ ከይዶም፡ ብጭካነን ዘይሰብኣውነትን ሊብያውያን ከስካሕክሑን ክግረሙን ንሰምዕ ኢና፤ እንተኾነ ሻቡ ኣብ ኤርትራ ሃገርና መንግስቲ ስለ ዝነበረ፡ መን ኢኻ ዚብለካ ዘይብልካ፡ እንተደሊኻ ትሓርስ፡ እንተደሊኻ ከኣ ትነግድ ኢኻ ኔርካ፤ ናብ ዝደለኻዮ ቦታ ድማ ናብ ውሽጥን ናብ ወጻእን ብዘይጸገም ትንቀሳቐስ ኔርካ።

እንተኾነ ኣብ ውሽጢ ሃገር እኹል ናይ ስራሕ ዕድል ስለ ዘይነበረ ግን ኤርትራውያን ስራሕ ንምርካብ ኢሎም ብድሌቶም፡ ወረ ገሊኦምስ ጉቦ ብምሃብን ኣያበያ ብምጥቃምን’ዮም ናብ መንግስቲ ጣልያን ተዓስኪሮም ወተሃደራት ኮይኖም። ዕስክርና ጣልያን ንውግእ ናብ ትርቡሊ (ሊብያ) ምዃኑ እናፈለጡ ከኣ ብድሌቶም ተዓሲኪሮም ከይዶም፤ ሎሚ ግን ደቆም ደቂ ደቆም፡ ሃገሮም መርገጺ እግሪ ዘይብላ ሓዊ ስለ ዝኾነቶም’ዮም መውጽእን መእተውን ስኢኖም፡ ዓቕሎም ኣጽቢቦም፡ ተገዲዶም ናብ ሊብያ ከይዶም። እንታይ ደኣ ክገብሩኸ ካብ ሃልሃልታ ሓዊ ረመጽ ይሓይሽ ኢሎም ፈቲኖም መሳኪን።

ምኽንያቱ፡ ሃልሃልታ ሓዊ ኩሉ ነብስኻ ስለ ዘቃጽለካ፡ ረመጽ ግን እግርኻ ጥራይ ስለ ዘንድደካ፡ ቃንዛ ንምቕናስ’ዩ እምበር ኣብ ሊብያ እውን ሓዊ ከም ዘሎ ጠፊኡዎም ኣይኮነን። ናይዚ ኹሉ መከራን ህልቂትን ኤርትራውያን ቀንዲ ተሓተቲ ግን እቶም ሰብኣውነት ዘይብሎም እንስሳታት ሊብያውያን ጥራይ ዘይኮኑስ ቀንዲ እቶም ኣብ ሃገርና ብሰላም ምንባር ከልኪሎም ዘሰድዱና ዘለዉ ኢሳያስን ጉጅለኡን እዮም።