ካብ ዓለም-በቃኝ
ክሳብ
ቪርጂንያ (ሃገረ-ኣመሪካ)

ታሪኽ ህይወትን ተመኩሮን ዶ/ር ገብረመስቀል ገብረማሪያም

ዶ/ር ገብረመስቀል፡ ኣብ ንኡስ ዕድመኡ መቐረት ትምህርቲ ከይጸገበ፡ ከም ኩሉ መንእሰይ ኤርትራ፡ በጃ ህዝቡ ህይወቱ መስዋእቲ ንምኽፋል፡ ናብ ሰውራ ኤርትራ ዝተሰለፈ ጅግና ሓርበኛ ኢዩ።

ኣብ ገድሊ (ሰውራ) ድማ፡ መስዋእቲ፡ መውጋእቲ፡ ከምኡውን ካልእ ብዙሕ ነገራት ኢዩ ዘጋጥም። ዶ/ር ገብረመስቀል፡ ብዘጋጠሞ ከቢድ መውጋእቲ፡ ናብ ኢድ ጸላኢ ወድቑ፡ ድሕሪ'ቲ ጸላኢ (መግዛእታዊ ስርዓት ኢትዮጵያ) ዝገበረሉ ሕክምና ድማ፡ ናብቲ ንሕልፈትካ እትበልየሉ 'ዓለም-በቃኝ' ዝተባህለ ቤት-ማእሰርቲ ናይ ኢትዮጵያ፡ ምስ ካልኦት ሓርበኛታት ኤርትራውያን ተዳጒኑ።

ዶ/ር ገብረ፡ ኣብዚ ብዘይካ ዕርበት ሕልና፡ ካልእ ክትሓስበሉ ዘጸግም ዝኸፍአ ቤት ማእሰርቲ ኾይኑ፡ ንኹልና ኤርትራውያን ዘኹርዕ፡ ሰሚዕካዮ'ውን መመሊሱ ዘደንጹ፡ ዓቢይ ዓወት ኢዩ ኣመዝጊቡ። ብትምህርቲ፡ ካብቶም ኣዝዮም ብሉጻት ተማሃሮ ኮይኑ ካብ መላእ-ኢትዮጵያ ዝለዓለ ሬኮርድ (Record) ብምስባር፡ ብኣዝዩ ልዑል ነጥቢ ላዕለዋይ ደረጃ ትምህርቱ ዛዚሙ፡ ኣብኡ ከሎ ኸኣ፡ ናጽነት ኤርትራ ኣርኪቡ።

ድሕሪ ናጽነት ኤርትራ፡ ትምህርቱ ኣብ ኣስመራ ዩኒቨርሲቲ ቀጺሉ፡ ኣብኡ'ውን ከም መምህር ኮይኑ ሰሪሑ። ብድሕሪኡ ንላዕለዋይ ትምህርቲ ናብ ወጻኢ ቐጺሉ፡ ኣብዚ እዋን'ዚ ድማ ከም ፕሮፈሶር፡ ኣብ ቪርጂንያ ዩኒቨርሲቲ፡ የገልግል ኣሎ። ኣብዚ እውን ዝተፈላለየ ሽልማታት ረኺቡ ኢዩ።

ዶ/ር ገብረመስቀል፡ ሓደ ካብቶም ኣብ ሃገርና ኤርትራ ፍትሒ ንምንጋስ ዝካየድ ቃልሲ፡ ብኹሉ መዳያት፡ ንቕሓት ኤርትራውያን ክብ ንምባል ዝሰርሕ ዘሎ ኣብነታዊ ምሁር ኤርትራዊ ኢዩ።

እቲ ታሪኽ፡ ካብቲ ኣብ ተኻታታሊ እዋናት ምስ ድምጺ ኣሰና ዝተኻየደ ዕላላት ብዝርዝር ክንመሃሮ ንኽእል። ንኹልና ኤርትራውያን ድማ ዓቢይ ኣብነት ኢዩ፡ ብፍላይ ንመናእሰይ ኤርትራውያን።

እዚ ታሪኽ'ዚ ንዓና ንርትራውያን፡ ንምስትንታን ዝሕግዘና ዓቢይ ሓቂ የግህደልና። ዶ/ር ገብረመስቀል፡ ኣብቲ ዝኸፍአ ቤት-ማእሰርቲ ናይ ኢትዮጵያ (ስርዓት ደርግ) ኾይኑ፡ ብብረት ኣንጻሩ ተሰሊፉ ዝነበረ ኤርትራዊ ክንሱ፡ ዋላ'ኳ ዘይንቡርን ብሳላ እቲ ዝነበሮም ተበግሶ ዝረኸቡዎ ዕድልን እንተነበረ፡ ግን ከኣ፡ ዕድል ናይ ትምህርቲ ክፍቀደሎም ምኽኣሉ፡ ሓደ ነገር ምልስ ኢልና፡ ከነወዳድር ይግድደና። ነቶም ኣብ ዝተፈላለየ ኣብያተ-ማእሰርቲ ኤርትራ፡ ዒላ-ዒሮን ካልእን ዘለዉ እሱራትና፡ ክንዝክር ንግደድ። ገለ ጭላፍ ካብዚ መሰላት'ዚ ይትረፍ'ሲ፡ ዋላ'ኳ ከምቲ ኣብ ዓለም-በቃኝ (ሰርዓት-ደርግ) ዝዝውተር ዝነበረ፡ ናይ ቤተሰብን ፈተውትን ምብጻሕን ደሃይ ምፍላጥን፡ ከምኡ'ውን ናይ ትምህርቲ ዕድል ምፍቃድን፡ ኣብዚ "ናትና" እንብሎ ስርዓት ዘሎ ኣብያተ-ማእሰርቲ ኤርትራ ፈጺሙ ኣይሕሰብን። ስርዓት ህግደፍ፡ ክሳብ ክንደይ ገፋዒን ጨካንን ምዃኑ ኸኣ የመልክተልና።

ከም በዓል ቢትወደድ ዝኣመሰሉ ጀጋኑ ሓርበኛታት፡ ንልዕሊ 25 ዓመታት ክሳብ ሕጂ ኣብ ማሕዩር ኣለዉ፡ ን15 ክሳብ 20 ዓመታት ሃለዋቶም ዘይፍለጥ፡ ምስ ስድራቤቶም ተራኺቦም ዘይፈልጡ፡ ብስርዓት ኣስመራ ዝተሓየሩ ሓርበኛታት ኤርትራውያን፡ ኣዝዮም ብዙሓት ኢዮም። ገለ ካብዚኦም፡ እቶም ቅዋም ኤርትራ ክትግበር፡ ሃገርና ድማ ከምቲ መብጽዓ ስዉኣትና፡ ብቅዋማዊ ስርዓት ክትመሓደር ስለዝጠለቡ ጥራይ፡ ኣብ ማሕዩር ዒላዒሮን ካልእን፡ ከም ዝስወሩን ሃለዋቶም ከም ዘይፍለጥን ዝተገብረ ኣርካናት ሓርበኛታትናን ጋዜጠኛታትናን፡ ይርከቡዎም። እዚ ኢዩ እምበኣር፡ ኩልና ኤርትራውያን፡ ከነስተንትንን ናብቲ እግዚኣብሔር ዝዓደለና ንቡር ሕልናና ተመሊስና፡ ንግፍዒን ምልኪን ክንቃወም፡ ንፍትሒ ድማ ተሓቛቚፍና ክንጓዓዝን፡ ዝድርኸና።

ካልእ፡ ነቲ ብኣማኢታት ኣሽሓት ዝቑጸር ኤርትራዊ፡ ኣብታ ልዑላዊት ኮይና ዝበላ ሃገሩ፡ ኣስተርሕዩ ንቡር ህይወት ከሕልፍ ብዘይምኽኣሉ ካብ ሃገሩ ሃጽ ኢሉ፡ ኣብ ሃገረ-ስደት ዝነብር ዘሎ፡ ኣማኢት ኣሽሓት ኤርትራዊ መንእሰይ ወለዶ፡ ኢዩ። ካብዚ ናይ ዶ/ር ገብረመስቀል ተመኩሮ እንመሃሮ ድማ፡- ይትረፍ'ዶ ኣብቲ ዕድላት ትምህርቲ ዘለዎ ሃገራት ተቐሚጥካ፡ ዋላ'ውን፡ ኣብቲ ኣዝዩ ጸቢብ ዕድላት ዘለዎ ውጡር ኩነታት እውን እንተኾነ፡ ተባዕ ውሳኔ እንትጌርካ፡ ነብስኻ ንምምዕባል ክትዕወት ከምዝከኣል ኢዩ። ስለዚ፡ ነዚ ሃብታም ምኽሪ ዝሓዘለ ዕላል ብጽሞና ሰሚዕና፡ ኣብ ህይወትና ክንጥቀመሉ ንኹሎም መንእሰያትና፡ እምሕጸን።

ሓውኹም፡
ዮውሃንስ ጸጋይ

እምበኣር፡ ምስ ዶ/ር ገብረ ገብረማሪያም ዝተኻየደ ዕላል ኣብ ታሕቲ እነሀልኩም-

See also past seminars and interviews with Dr. Gebre. Gebremariam:
ምስ ዶ/ር ገብረመስቀል ገብረማሪያም ዝተገብረ ዕላላትን፡ ዝተዋህበ ኣስተምህሮኣዊ ሰሚናራትን ኣብ ዝተፈላለዩ እዋናት፡-

ምስ ዶ/ር ገብረመስቀል ገብረማሪያም ዝተገብረ ዕላላትን፡ ዝተዋህበ ኣስተምህሮኣዊ ሰሚናራትን ኣብ ዝተፈላለዩ እዋናት።

Global Policy / መትከላት

Snitna: Code of Conduct — መርበብ ሓበሬታና ዝምራሓሉ መትከላት

ስኒትና.ኮም (www.snitna.com)፡ ነቲ ኣብ 1936 ዝወጸ መትከላት ጋዜጠኝነት (UK and Irish journalism): ከምኡውን ንመትከላት ሃገራዊ ማሕበር ጋዜጠኛታት (National Union of Journalists (NUJ)፡ የኽብር። Snitna Policy Code Asset Logo ብተወሳኺ፡ ነቲ ኣብ ዩቱብ ቻነል ዝወጽእ ሓበሬታ፡ ንመትከላት ማሕበራዊ መትከላት ዩቱብ (YouTube Community Guidelines)፡ እናኽበረ የውጽእ። ስኒትና፡ ብዝከኣሎ መጠን፡ ነዚ መትከላት'ዚን ናይ ሃገርና ኤርትራን ህዝባን ክዉንነትን ምርኩስ ገይሩ፡ ኣብ መርበብ ሓበሬታኡ ስኒትና (www.snitna.com) ክውጽእ ዝግብኦ ሓበሬታ እናመመየ ከውጽእ ይህቅንን ይጽዕርን። እዚ ስራሕዚ ምሉእ ዓወት ንክህልዎ ድማ ብዓቢኡ፡ ግቡእ ኣጠቓቕማ ተሳተፍቲን ምትሕብባርን ምስዝህሉ ኢዩ። ስለዚ፡ ነዚ መትከላት ዚ ንምኽባር ንኹሉ ተገልጋላይ'ዚ መርበብዚ ንጽውዕ። ዝኾነ ሃሳዪ ተርእዮታት ምስዘጋጥሙ፡ ቅሬታኹም ወይ ርእይቶኹም ብኢመይል ኣድራሻና ኣቢልኩም ክትልእኩልና ንላቦ። Read more

See also Related / ምስዚ ዝተኣሳሰር ሓበሬታ፡-