11 ዓመት ዝኽሪ፡ ናይቶም ብዕለት 03 ጥቅምቲ 2013፡ ኣብ ባሕሪ ላምፓዱሳ ጥሒሎም ዝሃለቑ 369 ኤርትራዊያን።

03/10/2024 00:15 AM

መበል 11 ዓመት ዝኽሪ፡
ናይቶም ብዕለት 03 ጥቅምቲ 2013፡
ኣብ ባሕሪ ላምፓዱሳ ጥሒሎም ዝሃለቑ፡ 369 ኤርትራዊያን።

11th Anniversary of 369 Eritreans perished at the Sea of Lampedusa, on 3rd October 2013

11 ዓመት ዝኽሪ፡ ናይቶም ብዕለት 03 ጥቅምቲ 2013፡ ኣብ ባሕሪ ላምፓዱሳ ጥሒሎም ዝሃለቑ 369 ኤርትራዊያን።
11th Anniversary of 369 Eritreans perished at the Sea of Lampedusa, on 3rd October 2013.

ሰላም ንኹልኹም ተኻታተልቲ መርበብ ሓበሬታ ስኒትና.ኮም!

ኣብ መፈለምታ ናይዛ ቅድሚ ሳልስቲ ዝተዛዘመት ወርሒ መስከረም 2024፡ ነታ ኣብ መስከረም 1961 ዝተወልዐት ሽግ ሓርነት ናይ ኤርትራውያን ብሓበን ዘኪርናያ።

ካብዛ ወርሒ ከይወጻእና፡ ኣብ 18 መስከረም 2024 ድማ፥ ነቲ ኣብ መስከረም 2001 ኣብ ሃገርና ኤርትራ ዘጋጠመ ዘሕዝን ታሪኻዊ ጥልመት፡ ንሕድሪን መብጽዓን ሰማእታትና፡ ማለት፡ ትግባረ ቅዋምና ዝተኾልፈሉ፥ ናጻ ጋዜጣታትና ዝተዓፈናሉ፡ ሓርበኛታት ኣርካናት መራሕቲ ሃገርናን ናጻ ጋዜጠኛታትናን ዝተሓየሩላ፡ ከም ሳዕቤኑ ኸኣ፡ ኣብ መላእ ኤርትራ፡ ጸላም ክትነግሰላ ዝጀመረት ዕለት፡ ብዓቢ ሓዘን ዘኪርናያን፡ ኣስተንቲንናን። እቶም ኣብዛ ዕለት 18 መስከረም 2001፡ ብቓጻ ተጨውዮም እተሰወሩ ሓርበኛታት፡ ነቲ ዉዕዉዕ ጠለብ ህዝቢ ኤርትራ ንምምላስ፡ ማለት፡- ሃገርና ናብ ዓዲ ቅዋምን ልዕልና ሕጊን፡ ንቡር ህይወትን ክትሰጋገር፡ ንኹሎም ዜጋታት ዘሳትፍ ሓድሽ መድርኽ ንሃገራዊ ምዕባለ፡ ኣብ ሃገርና ክኽሰትን፡ መንእሰይና ቀሲኑ ኣብ ገዛእ ሃገሩ ንኽነብርን፡ ዝጽውዕ ጠለብ ኢዩ ነይሩዎም። ይኣክል! ኩሉ ዝሓለፈ ኣከያይዳና ገምጊምና፡ ጉድለታትና ኣሪምና፡ ናብ ንቡርን ቅዋማዊን ኣሰራርሓ ንምእታው፡ ስልጣን ናብ ህዝብና ከነረክብ ኣሎና፡ ኢዮም ዝበሉ። እቲ ፊን ከም ዝበሎ ዝኸይድ ውልቀ-መላኺ ኢሳይያስ ኣፈወርቂ ግን፡ ካልእ ስዉር ዕላማ ስለዝነበሮ፡ ነዞም ኣርካናትና ጨውዩ ብምስዋር፡ ኣዒንቲ ሕብረተሰብና፡ ደፊኑዎ። ንሕና ውን ከም ህዝቢ፡ ነዞም ናይ ህዝቢ ሕቶ ዘልዓሉ መራሕትናን ጋዜጠኛታትናን፡ ኣብ እዋኑ ግቡእ እዝኒን ግብረመልሲን ኣይሃብናን። ኮነ ኸኣ፡ ህዝብና ኣብ ትሕቲ ስርዓተ-ራዕዲን ሽበራን፡ ስደትን ኲናትን ሰስዓቦ ዘየቋርጽ ሞትን ሓደጋታትን፡ ጃምላዊ ቅዝፈትን፡ ኣብ ዓሚቕ ሓዘንን፡ ተሸሚምና ንርከብ ኣሎና። ኣብ ታሪኽና ተራእዩን ተሰሚዑን ዘይፈልጥ ደልሃመት ኣቲና፡ ሃገርና ኤርትራ፡ ብፍልሰት መንእሰያት ደቃ፡ ካብ ዓለም እትልለ፡ እተገርም ሃገር፡ ኮይና ኣላ።

ኤርትራውያን መንእሰያት፡ ኣብቲ መወዳእታ ዘይብሉ ዋጋ ዘይክፈሎ ጊልያነት፡ ብስም ሃገራዊ-ኣገልግሎት፡ ንኣስታት 30 ዓመታት ተቖሪኖም፡ መጻኢ ዕድሎም ጸልሚቱ ይርከብ። ኣብታ ወለዶም በጃ ዝሓለፉላ ዓዶም፡ ቀሲኖም ክነብሩላ ኣይከኣሉን። ንቡር ህይወቶም ክገብሩ፡ ክምርዓዉን ክወልዱን፡ ዕድል ኣይረኸቡን። ናይ ውልቆምን መጻኢ ሂወቶምን ምዕባለ ክሓስቡ፡ ክመሃሩ፡ ክመራመሩ፡ ንነብሶም፡ ንስድራቤቶምን ሃገሮምን ዘርብሕ ሞያ ከጥርዩን፡ ዕድል ተዓጽዩዎም። እቲ እንኮ ዝራኣዮም ኣማራጺ ኸኣ፡ ካብ ሃገር ሃጽ ኢልካ ምውጻእ ኮይኑ። ኣብ ጉዕዞ ስደት ከቢድ ሓደጋታት እናፈለጡ፡ ካብ ዘሎናዮ ጊልያነት፡ ንሱ ይሓይሽ ብምባል፡ ናይ ህይወቶም ዕድል ንሓደጋ ኣቃሊዖም፡ ናብ "ዓዲ ራህዋ" ንምብጻሕ፡ እግሮም ናብ ዝመርሖም፡ ብኣማኢታት ኣሻሓት ተሰዲዶም። ኣብቲ ጉዕዞ ምድረበባን ባሕሪን፡ ኣእላፋት መንእሰያትናን ደቅናን ጠፊኦምን ተሳቕዮምን። ነዚ ሰጊሮም ዓዲ ሰላም ዝበጽሑ እንተኾነ ውን፡ ኣብ ጉዕዞ ብዝሓደሮም ከቢድ በሰላ፡ ብስነ-ኣእሙሮኣዊ ምንዋጽን ጭንቀትን ክሳቐዩ ይርኣዩ።

እዚ ኣብ ዕለት 03 ጥቅምቲ 2013: ንመላእ ዓለም ዘሰንበደን ዘሕዘነን፡ ናይ ልዕሊ 369 ኤርትራውያን ህልቂት፡ ኣብ ኣፍደገ ባሕሪ ኢጣልያ (ላምፓዱሳ) እምበኣር፡ ኣብ ኣፍ-ደገ እቲ ምዕቡል ዓለም ስለዘጋጠመ ጥራይ ኢዩ፡ ዓቢ ዜና ኾይኑ እምበር፡ ቅድሚኡ ይኹን ድሕሪኡ፡ ካብዚ ቁጽሪ'ዚ ዝዛይድ ይኹን ዝውሕድ፡ ኣብ ሓደ እዋን ጥራይ ዝተኸስቱ ብዙሓት ሓደጋታት ናይ ኤርትራውያን ተራእዮም ኢዮም። ንኣብነት ቅድሚ ህልቂት ላምፓዱሳ፡ 400 ኤርትራውያን፡ ኣብ ገማግም ባሕሪ ሊብያ ዝሃለቑሉ እዋን፡ ዝዝከር ኢዩ፡ ኣብቲ ናይ ሽዑ ዘጋጠመ ህልቂት፡ ውልቀ-መላኺ ኢሳይያስ፡ ኣብ ኤሪ-ቲቪ ወጺኡ፡ "እንታይ ክገብሩ ኢዮም ከ፡ ናብኡ ከይዶም?" ክብል፡ ከምዝሓጨጨሉ ንዝክር ኢና። እቶም ኣብ ጥዑም ቦታ እንነብር ኤርትራውያን፡ ነቲ እግዚኣብሔር ኣምላኽና ንጽቡቕ ክንጥቀመሉ ዝዓደለና ሰብኣዊ ሕልና፡ ብግቡእ ክንጥቀመሉን፡ ወጽዓ ናይ ህዝብና ንዓለም ክንነግርን፡ ኣይከኣልናን። እቲ ካብ ባሕሪ ተዘቚቑ ዝወጽአ ሬሳታት ኤርትራውያን ግን፡ ንመላእ ህዝቢ ዓለም፡ ነቲ ኣብ ህዝቢ ኤርትራ ዝወርዶ ዘሎ ግፍዒ፡ ኣውያቱ ብግብሪ ኣመስኪሩን ኣስሚዑን። ሎሚ ዕለት 03 ጥቅምቲ 2024፡ ነታ ህልቂት 369 ኤርትራውያን ዘርድኣትና፡ ርግምቲ ዕለት፡ ላምፓዱሳ፡ ን11 እዋን ኢና፡ ብዓቢ ሓዘን ንዝክራ ዘሎና።

ERIPM (03 October 2024:
ዝኽሪ መበል 11 ዓመት ግዳያት ላምፐዱሳ!!!

ህልቂት ላምፓዱሳ ኮነ፡ ቅድሚኡን ድሕሪኡን ዘጋጠመ ኩነታት፡ ኣብ መላእ ዓለም ዘሎ ኤርትራዊ ሓዘኑ ብእኩብ ገሊጹ፡ ነቲ ናብዚ ኩነታት ክበጽሑ ዝደፋፍአ ግጉይ ፖሊሲን ምልካዊ ምሕደራን ኤርትራ ድማ ብዓውታ ኮኒኑ። ኣብ ውሽጢ ኤርትራ ዝርከቡ ቤተሰብ ናይዞም ግዳያት ግን፡ ከምቲ ንቡር ወግዒ ናይ ሕብረተሰብና፡ ሓዘኖም ክገልጹ ኣይተፈቕደሎምን። እቲ መንግስቲ ኤርትራ ይኹን መራሒ መንግስቲ ሃገረ-ኤርትራ እንተኾነ እውን፡ ንጉድኣት ዝበጽሖም ቤተሰብ፡ ናይ ጽንዓት ይሃብኩም መልእኽቲ እኳ ኣይሃቡን። ብኣንጻሩ እኳ ድኣ፡ እታ እንኮ መራኸቢ ብዙሓን ኤርትራ (ኤሪቲቪ)፡ "ዘይሕጋውያን ዜጋታት ቀርኒ ኣፍሪቃ" ብምባል ኢያ፡ ነቶም ዝሃለቑ ኤርትራውያን ክትጠቕሶም ተሰሚዓ። እቲ ኣማኢታት ሬሳታት ኤርትራውያን፡ ከም ንቡር ናብ ዓዱ ከይዱ፡ ንቡር ሓመድ ኣዳም ክለብስ ስለዘይተኻእለ፡ ክሳብ ሕጂ ኣብ ግዝያዊ መጽንሒ ጋህስታት፡ ተኸዚኑ ኢዩ ዝርከብ። እቶም ሰብኣዊ ሕልና ዝጎደሎም ኣብ ዳያስፖራ ዝርከቡ፡ ኢደ-በይዛ ናይቲ ውልቀ-ምልካዊ ስርዓት ሃገርና ዝኾኑ ኤርትራውያን ምሁራት፡ ነዞም ኣብ ላምፐዱሳ ዝሃለቑ ኤርትራውያን፡ ዘይናቶም ስም ክህቡዎምን ኣብ ልዕሊ ሬሳታቶም ክስዕስዑን ኢዮም ተራእዮም። ካብዚ ዝኸፍእ፡ ብታሪኽ ዘሕትትን፡ ኣዝዩ ዘሕዝን ጭካነ ኸኣ የለን።

እቲ ንመንእሰያት ደቂ ኤርትራ ዘጋጥም ዘሎ ጥፍኣት፡ ኣብ ባሕሪታትን ምድረበዳን ጥራይ ተወሲኑ ኣይተረፈን። ኣብቲ ንህዝቢ ኤርትራ ፈጺሙ ዘይምልከት ኲናት ናይ ኢትዮጵያ (ትግራይ፡ ካልእ ከብባቢታት ኢትዮጵያን)፡ ተገዲዱ ናብ ሓዊ ዝኣተወ ኤርትራዊ መንእሰይ፡ ኣብኡ ዝሃለቐ ኤርትራዊን፡ ቁጽሩ ኣዝዩ ብዙሕ ምዃኑ ብብዙሓት ዝግለጽ እኳ እንተኾነ፡ እቲ ንኤርትራ ከም ናይ ውልቁ ጥሪት ገይሩ፡ ዝደለዮ ዝሸጣን ዝልውጣን ውልቀ-መላኺ ግን፡ ክሳብ ሕጂ፡ ንህዝብና መርድእ እኳ ክገብረሉ ኣይደለየን።

ሃገርና፡ ብዘይ ቅዋም፡ ብዘይ ልዕልና-ሕጊ፡ ከምዚ ዘላቶ ኣብ ትሕቲ ራዕዲን ሽበራን ክትቅጽል እንተፈቒድና፡ እቲ ንሃገርናን ህዝብናን ዘህልቕን ዘብርስን ዘሎ ኩነታት፡ ክቕጽል ኢዩ። እቲ ዲክታቶሪያዊ ኣመራርሓ ጥራይ ዘይኮነ፡ ንሕና እውን ከም ህዝቢ፡ ስጉምቲ ዘይምውሳድና፡ ተሓተትቲ ኢና ንኸውን። እቶም በዚ ኹነታት እዚ ዝያዳ ተሓተትቲ ዝኾኑ ኸኣ፡ እቶም ኣብ ውሽጢን ኣብ ደገን፡ ስልጣን ውልቀ-ምልካዊ ስርዓት ንምንዋሕ ዘገልግሉ ዘለዉ፡ ኣብ ዝለዓለ ሓላፍነት ዝርከቡ ኣካላት ኢዮም።

ኣብ ስደት ዘለዉ ኤርትራውያን፡ ብፍላይ ከኣ እቶም ብኽትሰምዖ ዘስካሕክሕ መግደራን ኣስካሕካሒ ሓደጋታትን ሰጊሮም ናብ ሃገረ-ሰላም ብምእታው ዑቕባ ዝረኸቡ መንእሰያት፡ ኣብ ከቢድ በሰላ ናይ ጭንቀት ኢዮም ዝርከቡ ዘለዉ። ኩሉ-መዳያዊ ምሕብሓብን ደገፍን ክንገብረሎም ከኣ ይግባእ። ነቲ ጠንቂ ናይዚ ኩሉ ውርደትን ጭንቀትን ዝኾነ ምልካዊ ስርዓት ሃገርና ንምምሓው፡ ኩልና፡ ይኣክል! ንበል። ህዝባዊን ፖለቲካዊን ውደባታትና ኣሐይልና፡ ነዚ ከይሲ ስርዓት ናይ ሃገርና፡ ሓሕ! ንበሎ። ዕድመ ምልኪ ንምሕጻርን፡ ፍትሒ ንምዕዋትን፡ ሃገራዊ ዜጋዊ እጃምና ነበርክት!

ዋሕዚ ስደት ኤርትራውያን፡

ኣብ ሓሙሻይ ዓመት ዝኽሪ ዝቐረበት ጽሕፍቲ፡ ነቲ ክሳብ ሽዑ ኣብ ህዝብና ዝወረደ ስደትን ጉድኣትን እትሕብር ስለዝኾነት፡ ደጊምኩም ኣብዚ ርኣዩዋ።

ኣብ መወዳእታ 2018 ኣብ ትሕቲ ሓልዮት ትካል ስደተኛታት ውድብ ሕቡራት ሃገራት (UNHCR) ዝተመዝገቡ ኤርትራውያን 507,300 ኢዮም።
እዚ ካብቲ ቅድሚኡ ዝነበረ ዓመት 2017 ዝነበረ ቁጽሪ ኤርትራውያን (ማለት 486,000 ኤርትራውያን) ዝለዓለ ምዃኑ ኢዩ። በዚ መሰረት፥ ኤርትራ፥ ኣብ ዓለምና፥ ኣብ ምፍራይ ብዝሒ ስደተኛታት ታሽዓይ ደረጃ ሒዛ ትርከብ ኣላ።

እተን ኤርትራውያን ስደተኛታት ተዓቚቦሙለን ዘለዉ ሃገራት፥- ኢትዮጵያ 174,000, ሱዳን 114,000, ጀርመን 55,300, ስዊዘርላንድ 34,100, ሽወደን 27,700, ኖርወይ 15,200, ነዘርላንድ 14,900, እስራኤል 14,500, ዓባይ ብሪጣንያ 13,000 ምዃኑ ጸብጻብ የመልክት።
ኣብዚ ላዕለዋይ ቁጽሪ`ዚ ዘይተጸብጸቡ፡ ናይ ዑቕባ ጉዳዮም ገና ኣብ መስርሕ ምጽራይ ዝርከብ 78,600 ኤርትራውያን ከምዘለዉ እውን እዚ ጸብጻብ ወሲኹ የብርህ።
እዚ ኣብ ላዕሊ ዝተጠቕሰ ቁጽሪ፡ ነቶም ምዝጉባት ሓገዝ ዝግበረሎም ኤርትራውያን ዑቕበኛታት ጥራይ ዝምልከት ኢዩ።
ዝርዝር ጸብጻብ ኣብዚ ተወከስ።

ንኹሎም ጉድኣት ዝበጽሖም ስድራቤታት፡ ጽንዓት ይሃቦም።

ንኹሎም ግዳያት፡ መንግስተ ሰማይ የዋርሶም።

መርበብ ሓበሬታ ስኒትና.ኮም
03 October 2024

ERISAT (03 Oct 2021): 8ይ ዓመት፡ ናይ ዝኽሪ ስነ-ስርዓት፡ ህልቂት ላምፔዱሳ።
ኣብቲ ሓደጋ ዘጋጠመሉ ቦታ፡ ላምፔዱሳ።
8th year Rememberance Day, of The Lampedusa Catastrophy in which over 350 Eritreans were perished in one day, at the door-step of the Sea of Lampedusa, on 03 October 2013.

ERISAT (03 Oct. 2021): ብቀጥታ ዝመሓላላፈ ዝኽሪ 8ይ ዓመት ህልቂት ላምፐዱዛ | 8th year Lampedusa...

Global Yiakl: ፍሉይ መደብ ብዓለምለኻዊ ህዝባዊ ምንቅስቓስ #ይኣክል
ብምኽንያት 3 ጥቅምቲ፡ ዝኽሪ 8ይ ዓመት ህልቒት ላምፓዱሳ።

MELA MEDIA: Documentary -
The Pain of Lampedusa 03102021 MM.
ሰነዳዊት ፊልም፦
ቃንዛ ላምፐዱዛ ቃንዛና ኾይና ሓሊፋ ኢያ'ሞ ንኹልና ስድራ ግዳያት ናይ ምጽንናዕን ደበስን ግዜ ይሃበና።

ERI-TV (News 04 Oct 2013).
ዜና ኤሪ-ቲቪ፡ ዕለት 04 ጥቅምቲ 2013

Voice of Assenna (07 Oct 2013): Interview with survivors of Lampedusa tragedy & Tewelde Tesfamariam Vacaro's call.
ERITREA: Nation in Mourning - following the Lampedusa tragedy which claimed the lives of hundreds of Eritrean immigrants.

Eri-Bahgna: መሰረት ሃገራዊ ፖለቲካ ኣብ ምስፋን ሰላምን ርግኣትን፣ ደሞክራስን ደሞክራስያዊ ምሕደራን፣ ሃገራዊ ልምዓትን ቁጠባዊ ዕብየትን ወሳኒ ታራ ኣለዎ!

Eritrea//TEKLINO....LAMPEDUSA, Italyhe 111 coffins were numbered

Video Assenna:ROME Demo:Mother Activist Asgedet Speaks Passionately Regarding the Lampedusa Tragedy

NEWEST VIDEO Funeral service of Eritrean Lampedusa Victims

Eritrea Lampedusa Tragedy/ @TG3L

Eritrea: Silence Kills

ኤርትራ መኣስ ረሲዕናኪ (ዜማ ድምጻዊት ብንያት ኪዳነ)

● ኤርትራ መኣስ ረሲዕናኪ (ዜማ ድምጻዊት ብንያት ኪዳነ)

ቃለመጠይቕ ምስ ኣባ ሙሴ ዘርኣይ። Interview with Father Mussie Zerai (06 October 2014)

ጸብጻብ ስደተኛታት ኣብ ዓለም 2018፡ Global Trends: Forced Displacement 2018, United Nations High Commissioner for Refugees.

See also Related / ምስዚ ዝተኣሳሰር ሓበሬታ፡-

Global Policy / መትከላት

Snitna: Code of Conduct — መርበብ ሓበሬታና ዝምራሓሉ መትከላት

ስኒትና.ኮም (www.snitna.com)፡ ነቲ ኣብ 1936 ዝወጸ መትከላት ጋዜጠኝነት (UK and Irish journalism): ከምኡውን ንመትከላት ሃገራዊ ማሕበር ጋዜጠኛታት (National Union of Journalists (NUJ)፡ የኽብር። Snitna Policy Code Asset Logo ብተወሳኺ፡ ነቲ ኣብ ዩቱብ ቻነል ዝወጽእ ሓበሬታ፡ ንመትከላት ማሕበራዊ መትከላት ዩቱብ (YouTube Community Guidelines)፡ እናኽበረ የውጽእ። ስኒትና፡ ብዝከኣሎ መጠን፡ ነዚ መትከላት'ዚን ናይ ሃገርና ኤርትራን ህዝባን ክዉንነትን ምርኩስ ገይሩ፡ ኣብ መርበብ ሓበሬታኡ ስኒትና (www.snitna.com) ክውጽእ ዝግብኦ ሓበሬታ እናመመየ ከውጽእ ይህቅንን ይጽዕርን። እዚ ስራሕዚ ምሉእ ዓወት ንክህልዎ ድማ ብዓቢኡ፡ ግቡእ ኣጠቓቕማ ተሳተፍቲን ምትሕብባርን ምስዝህሉ ኢዩ። ስለዚ፡ ነዚ መትከላት ዚ ንምኽባር ንኹሉ ተገልጋላይ'ዚ መርበብዚ ንጽውዕ። ዝኾነ ሃሳዪ ተርእዮታት ምስዘጋጥሙ፡ ቅሬታኹም ወይ ርእይቶኹም ብኢመይል ኣድራሻና ኣቢልኩም ክትልእኩልና ንላቦ። Read more

See also Related / ምስዚ ዝተኣሳሰር ሓበሬታ፡-

መበል 11 ዓመት ዝኽሪ፡ ናይቶም ብዕለት 03 ጥቅምቲ 2013፡ ኣብ ባሕሪ ላምፓዱሳ ጥሒሎም ዝሃለቑ፡ 369 ኤርትራዊያን።

11th Anniversary of 369 Eritreans perished at the Sea of Lampedusa, on 3rd October 2013

Snitna: Code of Conduct — መርበብ ሓበሬታና ዝምራሓሉ መትከላት

መበል 11 ዓመት ዝኽሪ፡
ናይቶም ብዕለት 03 ጥቅምቲ 2013፡
ኣብ ባሕሪ ላምፓዱሳ ጥሒሎም ዝሃለቑ፡ 369 ኤርትራዊያን።